Z Kalawy/Calau. Na wósebne zarědowanje pśepšosyło jo Spěchowańske towaristwo za serbsku rěc w cerkwi z.t. stwórtk, 19. maja do kalawskeje Serbskeje cerkwje pśi góźbje nowowudaśa prědneje serbskeje fible. Pśed wěcej ako 350 lětami běšo ceptaŕ Juro Ermel w Kalawje wudał prědne serbske ABC-kniglicki. Nimska wušnosć jo je dała pśeśiwo wótšym protestam serbskich a nimskich měsćanarjow Kalawy konfiscěrowaś a dopołnje znicyś. Weto jo se wuchował jaden jadnučki eksemplar Ermelowych ABC-kniglickow lěta 1671. Toś te jo spěchowańske towaristwo něnto wudało ako faksimilowy śišć z wědomnostnym nastawkom profesora Michaela Ermela. Profesor Ermel z Barlinja, kenž jo pótomnik ceptarja Jura Ermela z Kalawy, jo wó swójich slěźenjach źaržał ekscelentny pśednosk pśed pśisamem 30 pśibytnymi. Až prědna śišćana serbska šulska wucbnica srjejź 17. stolěśa jo była dolnoserbska a nic górnoserbska, jo wón ako wósebnje zajmny fakt wustajił.