Z Města/Cottbus. Hyšći až do 29. maja pokažu w Bramborskem krajnem muzeju za moderne wuměłstwo „Dieselkraftwerk“ wustajeńcu „DORFLEBEN. Fotografien seit den 1970er-Jahren bis heute“. Źaseś fotografow jo zapópadnuło to wejsne žywjenje, mjazy nimi Jürgen Maćij a Thomas Kläber. Fota su teke z Groźišća a Bělina, wóni njejsu njeznate, a wótbłyšćiju to žywjenje we jsach wót 1970 lětach sem.

Kuždy tych źaseś fotografow ma pitśku hynakšy fokus: Ten jaden pokažo to śěžke źěło w rolnikaŕstwje pjerwjej, wjasele rundy w kjarcmje, dalšny to camprowanje a zasej hynakšy jo wótmólował, kak duchtaŕ jo ducy na lanźe. Wźeśjo: Tak bogate ako źinsa njejsu luźe w pjerwjejšnych lětźasetkach byli.

Chtož wótcakujo nowy wid abo nowe perspektiwy, drje njebuźo wjele namakaś. Atmosferu zachadnosći, kótaraž njejo tak daloko pšec, jo pak derje wucuś. To jo slědnu njeźelu, na „Dnju muzeja“, pśiwabił woglědarjow ze stronow wokoło Frankfurta/Odra. Jaden muski, wón jo był 66 lět stary, jo gronił: „Som ducy z motorskim, ako cil som se wuglědał tu chóśebusku wustajeńcu. Som ga wótrosł we jsy, a te fota how mě slědk wjedu do źiśecych lět.“