Z Pódstupima/Potsdam. Slědny tyźeń jo bramborska Serbska rada gromadu stupiła na wobradowanje ako video-konferenca, a to 26. apryla. Serbska faraŕka Katharina Köh-lerowa (wót wósady w Dešnje a Žylowje, wóna jo koordiněrujuca faraŕka krajneje cerkwje na pólu serbskego wósadnego źěła) a Hartmut Leipner (wót Spěchowańskego towaristwa za serbsku rěc w cerkwi, STRC) stej pódla byłej a powědałej wó serbskich aktiwitach a wuwiśach w krajnej cerkwi (EKBO). Hartmut Leipner jo rozpšawił, až STRC ma mjaztym źaseś do dwanasćo cłonkow, a až wóno se wótgłosujo na duchnem pólu ze sakskeju krajneju cerkwju (Slěpjańska wósada a wórjejcańske strony pśisłušaju cerkwinemu wokrejsoju Šlazyńska Górna Łužyca a stakim teje EKBO, lěcrownož laže w Sakskej).