Z Łužyce/Lausitz. Mjasec maj jo pśišeł, z nim stej se skóńcnje zasej wjasele a zgromadnosć wrośiłej. Bomy kwitu, wšykno se zeleni. We našych jsach su luźe se ten kóńc tyźenja zmakali, su rejowali do maja (kótaremuž se źinsa cesto dosć groni „Dorfbums“ na nimski, město „Tanz in den Mai“). Wósebnje rědne jo było, až wšuźi su mógali cele oficialnje zasej zgromadnje stajaś majske bomy. We tych jadnych jsach jo nałog, ten bom stajaś 30. apryla, a w drugich to se tšoj 1. maj (kótaryž lětosa njejo był dodatny lichy źeń). Wót tych bomow a jich stajanja změjo Nowy Casnik wjele bildkow.