Z Janšojc/Jänschwalde. Bramborski krajny amt za wobswět (LfU) jo dnja 29. apryla dał swójo dowólenje za planowanu spalaŕnju wótpadankow „EVA“ na terenje janšojskeje milinaŕnje, w kótarejž kśě teke producěrowaś elektrisku energiju. Ako stoj we tej pšosbje, cotej firmje Veolia a LEAG wót lěta 2026 we tej spalaŕni pśeźěłowaś maksimalnje 480.000 tonow pśipšawjonych (aufbereitete) wótpadankow wob lěto. Firma LEAG jo groniła, až to dej se staś na eficientny part, kótaryž šonujo wobswět. Ta firma měni teke, až to su cełe njetšachotne wótpadanki z komunalnego a źěłaŕstwowego žrědła, kótarež njamógu se zasej wužywaś. Z togo procesa spalenja kśě wudobyś energiju.

W slědnych lětach jo była paleca diskusija w Janšojcach dla teje wěcy, kuždy we tej jsy se njemysli, až ta wěc njebuźo se wustatkowaś na strowotu. Radna licba wobydlarjow ma lylowu kśicu na wrotach ako wuraz protesta pśeśiwo tym planam. Wobydlarje su se zwězali k „Akciskej seśi pśeśiwo spalaŕni wótpadankow“. Jim se ten rozsud LfU njespódoba. Paul Župan (Suppan), powědaŕ teje seśi, jo pisał, až to absolutnje njerozměju.