Z Wórjejc/Hoyserswerda. Pónjeźele jo tudy wobradował pśigótowański wuběrk Serbskego mustwa, kótaryž se na Europeadu pśigótujo. Tam jo Pětr Brězan, referent Domowiny, rozpšawił wó stawje wokoło logistiki, pśebywanja a casowych wótběgow pśi wobźělenju serbskego mustwa na europskem turněrje. Wótjězd mustwa buźo 24. junija wjacor w Dešnje, pózdźej w Njebjelčicach w Górnej Łužycy.

Teke zjawnostne źěło jo było we fokusu wuběrka. Serbske rozgłosowe redakcije RBB a MDR su se pśipowěźeli, stakim jo rozpšawjenje w zjawno-pšawniskich awdiowizuelnych medijach zarucony. Tek casnikaŕske redakcije planuju, ten turněr pśewóźowaś. „Tuchylu su teke planowańske rozgrona z MDR a livestream-teamom wokoło Michała Cyža. Tak se naźejam, až se we tej kooperaciji zasej raźijo, wše serbske graśa w interneśe pokazaś“, jo Clemens Škoda gronił. Bjarnat Deleńk jo wuběrkoju pśedstajił naraźenje za drastwy, kótarež mustwo dej se woblac pśi reprezentaciji Serbow.