Barliń/Berlin. Dnja 4. apryla 2022 su se w Domje Paula Löbego mjazy drugim politikaŕki a politikarje, Serby, Frizy, Dany a Roma a Sinti pśi góźbje finisaže drogujuceje wustajeńce zmakali. Mjazy nimi su teke cłonki młoźinskeje wuměny 2019 byli. Tencas su w Barlinju byli a se wó situaciji mjeńšynow w Nimskej rozgranjali. Mimo togo su byli zajmne wulěty, na pśikład do něgajšnego Rajchstaga, źinsa wjaža Zwězkowego sejma.
To něntejšne zarědowanje jo kooperacija sekretariata mjeńšynow w Barlinju z wuběrkom za nutśikowne a domownju było. Wustajeńca wórdujo pó styrich lětach pśigótowanjow prědny raz w Nimskem zwězkowem sejmje prezentěrowana. Organizatory su glucne, až finisaža jo móžna była, pśeto nejpjerwjej njejsu zmakanja dowólone byli, jano online zarědowanja. Wuzwólone gósći, „3G“ a FFP-nagubki su skóńcnje wšykno zmóžnili. Zjawnosć jo měła wjelgin wobgranicowanu móžnosć, se to cełe woglědaś wót 17. měrca do 8. apryla togo lěta.