Z Běłeje Wódy/Weißwasser. Za lodohokejistow z Běłeje Wódy jo se sezona 2021/22 zakóńcyła napšawdu z happyendom. Prědnego apryla su to rozsudne slědne graśe dobyli a z tym jo było jasne, až wóstanu te „Liški“ hyšći dalšne lěto w drugej nimskej lize. Wjasele jo było pla grajarjow a pla wšych pśiwisnikow a fanow wjelike. Wósebnje dla togo, až jo była ceła sezona za nich bejnje śěžka a tšašna. Na kóńcu su ga musali sedym raz graś pśeśiwo mustwoju „Tölzer Löwen“ z Bayerskeje. Styri raze su dobyli pśeśiwo jim, a to slědne graśe su samo ze 10:1 wusoko dobyli! A toś jo było to slědne z tych sedym graśow 3. apryla w Běłej Wóźe tak hejnak wjeliki a wjasoły „módro-žołty“ swěźeń w tamnej sportowej hali. „Za nami lažy wjelgin komplicěrowany cas, a to teke dla korony. Smy musali južo pśed gódami a na kóńcu starego a na zachopjeńku nowego lěta graś mimo pśiglědari. Teke bejnu licbu grajarjow jo było zranjonych, a casy jo było śěžko, zestajiś kompletne mustwo“, se domyslijo Dirk Rohrbach, jadnaŕ tradicionelnego lodohokejowego mustwa.