Z Města/Cottbus. Wšykne se wjasele, balokoparje a te pśiglědarje. Něnt mógu zasej pórědnje graś a narske pśiglědarje mógu zasej mimo problemow pśiś do stadiona abo na sportnišćo. Teke „serbskim koparjam“ w Dolnej Łužycy se take wjelgin spódoba. Mógu zasej graś we swójich mustwach a se wušej togo pśigótowaś na 4. EUROPEADU, na europske mejstaŕstwa narodnych mjeńšynow w balokopanju, ako budu wót 25. junija do 3. julija togo lěta w Korytańskej/Kärnten w Awstriskej. 2020 a 2021 jo wóna bóžko dla pandemije wupadnuła, lětosa pak dej se wóna nachwataś.

Wobźěliś budu se tam – tak ako to něnto wuglědajo – wušej 20 muskecych mustwow a k tomu hyšći žedne žeńskece mustwo z cełeje Europy. (Móžo byś, až bóžko jadno abo druge mustwo dla teje wójny wupadnjo na tej EUROPEAŹE.) Teke Serby z Łužyce budu tam zastupjone. Bóžko pak jano te muske, žeńske nic. Domowina ako zagronita za to jo k tomu groniła, až buźo wjelgin śěžko, gromadu dostaś dosć źowćow za mócne mustwo. To su źowća z Dolneje Łužyce, ako graju w mustwach w Hochozy a hynźi, woblutowali. Su ga kśěli dojěś do Korytańskeje.