Z Wochoze/Nochten. Łužyski park znjasonych kamjenjow (Findlingspark) we Wochozy buźo drugi źeń jatš (to pónjeźele) wótcyniś za tradicionelny źeń familijow. To jo groniła Anita Schwitallina, wóna jo zastupujuca jadnaŕka tudy a wjednica wobłuka marketing togo spěchowańskego towaristwa za ten wochožanski park. „Pódla budu jatšowny wuchac ,Leichtfuß und Liederliesel‘ z muzikaliskim programom. Kuždy móžo z ponyjoweju kutšu a parkoweju zeleznicu jěś. Teke ‚Orchester Lausitzer Braunkohle‘ jo pódla“, wóna groni.

We srjejźi deje źiśi byś. Jatšowny wuchac co se rad z nimi wótmólowaś daś, a rano zajtšo buźo wón hyšći jaja schowaś. Źiśi deje sami glědaś, źo něco lažy. Wót zeger 11:00 buźo muzikaliski program, źož kuždy móžo se wobźěliś. Teke ponyjowa kutša jězdźi wót zeger 11:00 do zeger 16:00. 13:30 buźo dujaŕska muzika graś. Něco k jěźi a piśa zawěsće teke buźo.