Pódstupim/Potsdam. Buźo bilingualna fachowa wucba na Dolnoserbskem gymnaziumje se zmócniś na kosty intensiwneje serbskeje wucby za źiśi, kótarež su wót młodych lět wobźělone na Witaj-projekśe? Pśed tym ga jo warnowała gano Serbska rada w lisće na kubłańske ministarstwo. (Njeměr jo se zwignuł za tym, ako šulski amt w Chóśebuzu jo šuli pśikazał, až do 24. junija (!) koncepciju za bilingualnu wucbu až do abitury wuźěłaś – glěj powěsć na prědnem boce).
Zachadny stwórtk su wótpósłane w bramborskem parlamenśe wupšašowali ministarja za kubłanje Güntera Baaskego (SPD) za teju wěcu. To jo se stało we aktuelnej pšašańskej štunźe. Tu nastupnosć stej pśednjasłej Anke Schwarzenbergowa (Lěwica) a Marie Luise von Halem (Zelene).