Něnto jo jasne, źo a ga pśewjeźo Domowinska župa Dolna Łužyca swóju lětosnu głownu zgromaźinu. Pśedsedaŕstwo župy jo slědny tyźeń na swójom pósejźenju wobzamknuło, až wóna buźo pětk, 10. junija, a to w Rogowje (Neu-Horno) pla Baršća w gósćeńcu. Z tym jo wóna oficialnje zwołana. Na njej buźo se wobźěliś wokoło 80 delegatow z tych wušej 40 kupkow a 30 towaristwow ako pśisłušaju župje Dolna Łužyca. Južo w slědnych lětach jo kśěła župa Dolna Łužyca w Rogowje wugótowaś głownu zgromaźinu. To pak jo se dla korony bóžko mimo kuliło.

Domowina pśepšosyjo 1. julija do Lubina

Za pětk, 1. julija, planujo Domowina ako kšywowy zwězk wětše zmakanje w Lubinje. Wóna co tam pśepšosyś na šyroke a wólne rozgrono zastupnikow Domowiny a jeje župow a towaristwow a serbskich institucijow z Dolneje a Górneje Łužyce, cłonkow wšakich parlamentow a dalšnych wósobow z Dolneje a Górneje Łužyce, ako źěłaju aktiwnje na serbskem pólu. K tomu jo pśedwiźony teke kultury program.

Wupytali jo se Domowina za to rowno Lubin, dokulaž su se w slědnem casu wuwili wuske zwiski mjazy Domowinu a wokrejsom Damna/Błota (LDS).