Ze Zabroda/Sabrodt. Tudy, we tej jsy njedaloko Carneje Plumpy, maju muzej jatšownych jajow. Za tym stoj Dorothea Tśěkowa wóttudy, kenž ma ten muzej na swójom dwórje. Gano jo wóna měła 70 burstak.

Prědny raz jo se pśemyslowała w lěśe 1984, až co taki muzej měś. To pak njejo se raźiło, rozmjej to pśizjawjenje muzeja pla Rady wórjejskego wokrejsa. Ako se groni, njejsu tencas nic kśěli słyšaś wót turistiskich póbitowanjow.

To mólowanje jatšownych jajow na serbsku wašnju jo weto wóstało, to jo doma we ewangelskich Serbach wórjejskich, grodkojskich a běłowóźańskich stronow.

W Zabroźe su na kuždy pad pilnje mólowali jaja, na dwórje Mat-thesa Kujaša, teke druge nałogi a serbsku rěc su woplěwali. Kujašojc Christiane jo wušej togo znata šlodaŕka serbskich drastwow była. Jeje źowka Marja (wóženjona Marie Burkhardtowa) jo rada źěłała z wóskom a jajami. Jeje źowka Dorothea (Tśěkowa) se wuznajo ze wšyknymi technikami pyšnjenja jajow. Wót lěta 1971 wóna zběra serbske jatšowne jaja, a wót lěta 2002 ma oficialnje swój muzej jatšownych jajow.