Z Trjebina/Trebendorf. Serbski sejm jo se 2. apryla w prezencnej formje zmakał. Wóni su byli gósći Domowinskeje kupki w Trjebinje. Angelika Balccyna wót teje kupki jo wulicowała wót młoźiny a jo woblutowała, až wukniki w slěpjańskich stronach, kenž su wuknuli serbsku rěc, njamaju serbšćinu na gymnaziumje w Běłej Wóźe a až se serbska rěc njepóznawa ako druga cuza rěc.
Sejmikarje su se teke zaběrali z wójnu pśeśiwo Ukrainje. Starstwowa prezidentka Edith Pjeńkowa jo spominała na teje wopory a jo wulicowała wót swětoweje wójny. Sejmikarje su mjelcali we wopomnjeńskej minuśe.
Dalej jo David Chmelik wót załožby „Slavonic Europe“ (wón jo dojěł z Brüssela) prezentěrował póstupy, což nastupa europski projekt ze serbskim wuchadnišćom „Lusatia Glow“. Ten projekt dej zwězaś luźi w Europje pśez kulturu, rěc a muziku. K tomu su wšake geografiske, medialne, digitalne a muzikaliske sekcije planowane w lětoma 2023 a 2024.
Centralna tema dnjownego pórěda jo było to druge lazowanje pśedłogi statnego dogrona. Tenraz jo šło wó rozměru sobupóstajenja a definicije serbskego sedleńskego ruma.