Z Picnja/Peitz. Stśěłaŕnja w Picnju na droze Brjogowe cło numer 67 wórdujo skóro wótryta. Tu wjažu su w lěśe 1812 natwarili, mjaztym wóna stoj 20 lět prozna a kradu wobškóźona. W sćěnach su rozpukliny a fundament spadujo. By wjelgin droge było, ten stary chrom saněrowaś, płaśi ga mjenjej, to stary wótryś a něco nowego twariś. Toś buźo na tom městnje nastaś moderny dom za wěcej familijow.

Mě togo chroma, rozmjej „stśělaŕnja“ pśiźo wót stśělaŕnje (Schießanlage), kótaraž jo tam była za domom. Pśez mósćik nad Małksu jo jaden pśišeł na tu stśělaŕnju, kótaraž jo na arealu ludowego parka była, tam źož źinsa jo nakupowaŕnja „Malxecenter“. Wjaža ma dłujku historiju. Něga jo how był woblubowany gósćeńc, samo ze zalom. Jo teke był pachany domk pśi Małksy, kótaryž su za wšym zdaśim wužywali ako lodowu piwnicu. W lěśe 1957 su stśělaŕnju pśetwarili, aby kino měli. Dalšny raz su ju pśetwarili w lěśe 1993 a kradu modernizěrowali. Pśez nowu techniku su mógali pokazaś filmy w „totalvision“.