Wónej stej byłej pśecej prezentnej we serbskem žywjenju: Ani Lindnerowa (86) a Joachim Lindner (85) z Kósobuza. Akle we slědnych lětach stej se pitśku slědk śěgnułej. Slědny tyźeń stej něnt swěśiłej zeleznu swajźbu.
Joachim Lindner jo znaty ako wušywaŕ drastwinych źělow a lubowaŕ serbskeje burskeje drastwy, rownož póchada ze Šlazyńskeje. Jomu jo jogo pózdźejša žeńska na rejowanišću tak wjelgin w serbskej drastwje se spódobała, až jo kśěł z njeju se bližej zeznaś. Jeje mama Elisabeth Ramotowa jo była šlodarka serbskeje drastwy a jo na to śišćała, aby jeje źowka pśecej serbska chójźiła. Ako ta mama jo 1991 wumrěła, jo kśěła Ani Lindnerowa sama dalej burska wóstaś. Wósebna jo „ta Lindnarka“ teke dla togo, až hyšći źinsa běžnje serbski powěda, rownož w jeje wokolinje nichten wót tych starych wěcej njejo, ako serbski wumějo. Ani Lindnerowa jo teke muzikaliska. Móžo wjelgin derje spiwaś a jo dłujko na orgelach w popojskej cerkwi grała.