Z Chóśebuza/Cottbus. Sobotu su grajarje a muzikarje Serbskego ludowego ansambla k nam dojěli a pokazali interaktiwnu muzikowu bajku „Łasnosćiwa liška“ w awli Dolnoserbskego gymnaziuma.

Pśišli su zwětšego stare starjejše z enkelźiśimi, teke cełe familije. Na zachopjeńku jo grajaŕ a powědaŕ Petr Cyž wuwitał publikum a jo rozkładował, kak to běžy z teju interakciju. Šesć źiśi jo było na jawišću a su na taki part dostali pódlańsku rolu. Wóni su měli wažny nadawk, su dejali něco graś z instrumentom na wěste gronidło (Stichwort). Publikum jo mógał pódpěrowaś to pśedstajenje, na pśikład wětš imitěrowaś abo to šwarkotanje lista.

W serbskej a nimskej rěcy jo był ten kus, kótaryž jo Jewa-Marja Čornakec napisała. Tam jo wulicował grajaŕ Cyž wót liški, kótaraž njejo mógała spaś. Wóna starcy na wjelka a luštujo rundu, což se wjelkoju wjelgin njespódoba. Wón pšosy lišku na duel! Hajtka a pjas stej teke wobźělonej na tej bajce. Zawěsće jo wšykno derje wujšło!