Z Dešna/Dissen. Tudy w muzeju se wjelgin wjasele na nowu sezonu. Za tym ako njejsu mógali w slědnyma lětoma bóžko licyś z pśewjele gósćimi a woglědarjami, by kśěli lětosa wuwitaś w swójom woblubowanem a znatem muzeju zasej wjele towzynt gósći.

Slědny tyźeń srjodu su měli za to dobry zachopjeńk. Njejsu to byli narske turisty, ako su se rozglědowali, ale wósebnje wutšobnje witane gósći. Muzeum ga jo pśepšosył ukrainskich luźi, ako tuchylu bydle w bliskich serbskich jsach. W Dešnje na pśikład su wóni namakali pśebytk pla tśich swójźbow a w něgajšnem domje wognjoweje wobory, ako su wobydlarje wjelgin spěšnje k pórědnemu bydlenju wugótowali. W susednem Strjažowje su we dwěma domoma namakali wuběgarje z Ukrainy nowu domownju. A mimo nich jo pśišła do muzeja teke wětša kupka z Husa, ako jo howko pśiwjadł Mario Kätzig ze swójim awtom. Tak jo se ten źeń pśinamakało wokoło 20 luźi z Ukrainy w muzeju – młode žeńske, šulske źiśi a starše luźe. Ten nejstaršy mjazy nimi jo był 74lětny starki, kótaryž běšo se ako syn sowjetskego oficěra w Halle naroźił.