Wurězk z knigłow „Verlorenes Idyll“, źož jo burski dwór namólowany.Te knigły jo Klei wudał. Pór eksemplarow jo hyšći dostaś pla Andreas Scheffera. (lej spózy)Z Běłeje Wódy/Weißwasser. Južo pśed chylu jo Nowy Casnik pisał wót kalendarja „Verlorenes Idyll“, źož wobraze Hanza (Hans Joachim) Kleija su wótśišćane. Ceji wón jo, ten wuměłc, kenž wopisujo ze šćotku tu pśisamem zgubjonu naturu kołowokoło Miłoraza, Zwěrjetńca zagrody a Mužakojskeje góle, strony wokoło Běłego Šepca? Nowy Casnik jo se wudał do Běłeje Wódy, źož bydli w romantiskem domje „w zelenem“. How jo Klei pokazał swój atelier, a swóju źěłaŕnju za ramiki. Wšuźi wón něco pśigótujo. W źěłaŕni lažy kórta Mužakojskeje góle. Wón wulicujo: „To jo mój rewěr, wót tam mam swóje motiwy. Ja njesejźim ze štafelaju w góli, ale mólujom z głowy“. Wjele togo, což jo mólował, jo nazběrany w knigłach. K tomu jo na prědnyma bokoma napisane, kak jo wjerch Pückler něga stwórił tu rědny Zwěrjeńc pla Běłeje Wódy. A tam teke stoj, co jo cil tych pśedstajonych wobrazow: Wóni deje spomnjeś na rědnosć a na zwisowatosć Mužakojskeje góle.