Z Baršća/Forst. Tšochu źiwno to jo! We wokrejsu Sprjewja/Nysa wóteběr licba wobydlari. Gaž jo how bydliło pśed 20 lětami hyšći něźi 140.000 luźi, jo jich to źinsa jano hyšći wokoło 120.000. Na drugem boce pak jo licba wuknicow a wuknikow we šulach stabilna, jo, wóna samo tšochu rosćo! Rowno to groni, až trjeba šulstwo wšu pódpěru, aby se źiśi a młodostne pśecej lěpjej wukubłali a pón ako dorosćone wóstali we swójej domowni w stronach mjazy Gubinom a Grodkom, mjazy Baršćom a Chóśebuzom.
W maju togo lěta kśě we wokrejsnem sejmje Sprjewja/Nysa wobzamknuś plan za wuwiśe šulstwa w lětach 2022 do 2027. Ten plan, ta koncepcija jo wjelgin wobšyrna a wokoło 400 bokow tłusta.