Campitello di Fassa/Schnaittach. Rědnučke góry, wjelicne skały a gnujuce lěse – taku idylu pśedstajamy se, gaž myslimy na Dolomity. How jo mjeńšyna doma, etniska kupka ze swójimi tradicijami a rěcu, rozmjej: Ladinarje. Z jadneju wót nich jo se Nowy Casnik rozgranjał.
Móžośo se nam pśedstajiś? Mě se groni Marika Favé, oficielnje Marica. Som 48 lět stara a bydlim w Campitello di Fassa w Dolomitach. Som sněgakowaŕska wucabnica a górska wjednica. Mam jadnasćo lět staru źowku a som Ladinaŕka.
Wjele Ladinarjow dajo?
Mjaztym bydle Ladinarje we tśich prowincach: Trento, Bolzano a Belluno. To jo politiske źělenje, weto maju se Ladinarje za etnisku kupku. Ladinarje ze wšakich prowincow maju zgromadnu literaturu, zgromadny muzeum, telewizne programy a zgromadny casnik. W Trento a Bolzano wucy se ladinšćina w zakładnej a srjejźnej šuli. Gaž se procujomy wó zjawne źěłowe městno, ga pśinjasu znaśa ladinšćiny wěcej dypkow na lisćinje procowarjow. Dokumenty na komunalnej rowninje su pśecej na italski a ladinski.
Kak identificěrujośo se ako Ladinaŕka?