Z Noweje Jsy/Neuendorf. 124. zapust wejsneje młoźiny jo zachadnu sobotu pśiwabił wjele luźi ze jsy a z wokolnych gmejnow. Za tym až jo łoni wupadnuł ten tradicionelny swětosny pśeśěg, su se młode Nowsanarje něnto zasej pokazali w serbskich drastwach a we wupyšnjonych woblakach. Mjazy 14 pórikami su wšake zapustarje pśišli z Barbuka a z Husa, wušej togo jo 17 źiśi sobu śěgnuło, teke woblacone pó starej serbskej wašni.
Wobźělniki a woglědarje su połdnjo, pśi słyńckowem wjedrje, gromadu pśišli w zmakańskem centrumje „Kastanienhof“. We tom starem gósćeńcu su mamy a stare mamy młodostnych pśigótowali rědny bufet z tykańcom, skibkami a drugimi pśikuskami. Źiwajucy na hyšći płaśece póstajenja dla korony, su wejsanarje teke pśigótowali mału staciju za testowanje.