Z Gołkojc/Kolkwitz. W šulskem lěśe 2023/24 dej se oficialnje zachopiś wucba na nowej cełkownej šuli (Gesamtschule) na teritoriumje wjelikeje gmejny Gołkojce, blisko Hajnka/Hänchen. Na tej nowej modernej šuli, za kótaruž jo wokrejs Sprjewja/Nysa zagronity, buźo pón wokoło 600 źowćow a gólcow wuknuś wót 7. rědownje. Chtož co, móžo tam teke až do dwanasteje rědownje wuknuś a to wótzamknuś, zakóńcyś z abituru.

Něnto se tam na „zelenej łuce“ južo pilnje twari a źěła. Nastajili su tam ako prědne kontejnery za źěłaśerjow a za notny twaŕski material. Ta jama, źož dej raz šula stojaś, se teke pśigótujo. Bóžko su měli z tym wšake wušparanja a śěžkosći dla togo až jo tam stojała wóda jo něźi 80 cm wuša. Pśeto gruntowa wóda jo stupała, dokulaž jo se w slědnych mjasecach wjele padało. Ta wóda se wótplumpujo, tak až mógu skóro – 14. měrca – zachopiś z prědnymi źěłami za surowu twaŕ (Rohbau). K tomu budu tam tśi bejnje wusoke a wjelike krany nastajiś. Wažny objekt za wše twaŕske źěła jo trafo-stacija, z kótarejuž budu twaŕnišćo a pózdźej teke cełu šulu zastaraś z elektriskeju energiju.