Ludowe nakładnistwo Domowina jo gano wózjawiło nowe knigły za źiśi. Jim se groni „Kak su wroblik Frido a jogo pśijaśele do Afriki leśeś kśěli. Spisała jo je Jewa-Marja Čornakec, ilustrurěrował jo Günter Wongel. Do dolnoserbskeje rěcy pśestajiła jo Christa Elina. Gaž nowe knigły su, dej zawěsće teke premjera byś. Ta jo była za źiśi, ned dwójcy. Zachadnu srjodu jo nakładnistwo toś pšosyło źiśi we Wětošowje a Tšupcu na taku prezentaciju. Ta prědna jo była ned zajtša we wětošojskem horśe. Wótkubłarce Uta Körnerowa a Anke Gräfowa stej tam pśišłej z wuknikami 1. do 3. rědowni a ze pśedšulskimi źiśimi. Jich jo nagromadu było 25. Jo markowaś, až te źiśi wót jadneje prezentacije do drugeje maju lěpše a lěpše znaśe serbskeje rěcy, to jo wuchwaliś.