Pśedslědny kóńc tyźenja jo chóśebuski Kolektiw Wakuum, ako projekt za serbsku kulturu a wuměłstwo, pšosył na wósebne zmakanje. W rumnosćach „Studio 26“, kótaryž jo běrow za nutśikowny design na Dwórnišćowej droze, su se cłonki kolektiwa sobotu a njeźelu rozgranjali ze zastupnikami wšakich młodych serbskich iniciatiwow. Mjazy nimi su teke byli Astrid Šramina wót Dolnoserbskeje kulturneje akademije, młoźinski koordinator Domowiny Tobias Unger a Sylke Laubensteinowa-Poleńcojc wót Załožby za serbski lud, kótaraž jo spěchowała to zmakanje. Głowny cil pśibytnych na tom kóńcu tyźenja jo był załoženje noweje seśi alternatiwnych serbskich projektow. Na zakłaźe teje seśi kśě cłonki kšuśiś widobnosć swójich projektow a wutwariś efektiwne zgromadne źěło. Za tym, až stej Hella Stoleccyc a Maja Šramojc wót kolektiwa pśiwitałej pśibytnych w nimskej a dolnoserbskej rěcy, su se sobotu pśedstajili wšake iniciatiwy. Wót dogromady 20 wobźělnikow jo lipšćańska wuměłcowka Karoline Schneiderojc powědała ako prědna.