Tak ako w slědnem lěśe jo teke lětosa jano doma zapustowaś móžno. Zajmowane su mógali se 26. februara z linkom do livestreama na platformje youtube dostaś. Zachopjeńk jo był zeger 19:00 a Tobias Unger, nowy koordinator młoźiny pla Domowiny, jo wjacor moderěrował. Dla pandemije su pśiglědarje w kjarcmje „K złośanemu plonoju“ w Hochozy zakazane byli, togodla kuždy wót nich jo musał sam prědk wobrazowku swěśiś. Za muziku jo band „NaUnd“ zagronita była a za notnu atmosferu jo se wěcej ako 20 zapustaŕkow a zapustarjow póstarało – wšykne pśibytne su zawěsće negatiwnje na koronu testowane byli. Swěźenjarje su z Dešanka, Janšojc, Pśiłuka, Hochoze, Wjerbna, Tšupca, Bórkow a Žylowa pśišli a su wjele wjasela měli (njeźiwajucy na njezwjaselece wobstojnosći).

Pó krotkej retrospektiwje na „dobry stary cas“ – pótakem na něgajšne zapusty, na pśikład 2012 w Janšojcach – ako nastajenje na pśiduce góźiny, jo se live-wusćełanje zachopiło. Prědny dypk moderatora pak jo bóžko měł tužnu aktualnosć, ako jo powědało wó wobchadowem znjeglucenju pla Hochoze a wó wójnje w Ukrainje.