Z Baršća/Forst. Na 23. pósejźenju wokrejsnego sejma Sprjewja-Nysa slědnu srjodu jo było na wšaki part to grono wó tom serbskem. Łoni běchu we wokrejsnem parlamenśe wobzamknuli, až kśě z stipendiumom wabiś a pódpěrowaś tych młodych luźi, ak kśě se pódaś do Lipska na studium sorabistiki a byś pózdźej serbska ceptaŕka abo serbski ceptaŕ. Wažne jo, až wóni pó studiumje nanejmjenjej pěś lět dłujko wuwucuju w jadnej šuli we wokrejsu dolnoserbsku rěc. Něnto dej se ta dobra wěc stajiś do statka. Tśi wósoby, ako studěruju na Instituśe za sorabistiku w Lipsku na ceptaŕstwo, su stajili w slědnych mjasecach pšosbu na taki stipendium, to groni, na 500 euro wob mjasec. Wót tych tśoch dej se něnto źowćo abo gólc wupytaś, kenž dej dostaś taku pódpěru za cas studiuma. Ten nic rowno lažki nadawk pśewzejo wósebny fachowy gremium. Taki su wuzwólili slědny tyźeń cłonki wokrejsnego sejma.