Z Kśišowa/Krieschow. Južo drugi raz jo pandemija zadorała woplěwanjeju stareje tradicije, kótaruž luźe w našych jsach lubuju a tak raźi sobu gótuju. To póžedanje za wugónjowanim šereje zymy a za wugónjowanim śěžow wšednego dnja stej byłej mócnjejšej. Togodla su te zapustowe kłobyki kśišojskich gólcow a muskich śěgnuli pó jsy, zgromadnje ze zapustoweje drastwy źowćow. Gdyž njejo móžno było, až kłobyki a drastwy pśidu pó jsy z dujaŕskeju kapału, gdyž njejo móžno, až wjele luźi pśiglědujo a se wjaseli, ga jo to było nanejmjenjej śichy symbol z wjelikeju mócu. Na taki part su nastali kradu wósebne kupkowe fota we wósebnych rožkach našeje jsy. Fota su nastali, kótarež deje wubuźiś kśěśe na wósebny zapust. Zawěsće njebudu serbske drastwy w lěśe 2022 wóstaś w lodkach! Teke, gdyž wjeliki pśeśěg wóspjetny raz njejo móžno, ga njedej zyma dobydnuś.