Z Drjowka/Drebkau. Muzej Serbska tkajaŕska śpa w Drjowku se južo něnto na jatšy pśigótujo. Gódowna wustajeńca ma se wóttwariś, ma se pó fachojsku zapakowaś, a nowa jatšowna wustajeńca ma se wugótowaś. To dajotej k wěsći wobej sobuźěłaśeŕce muzeja Serbska tkajaŕska śpa w Drjowku.

Ingrid Standkowa (Standke) statkujo južo dlej ako lětźasetk ako cesnoamtska sobuźěłaśeŕka muzeja a ako cłonk spěchowańskego towaristwa togo drjowkojskego muzeja. Wjele lět jo gromadu źěłała z něgajšneju šefowku muzeja, Roswithu Baumertoweju, ako jo pśed lětom wumrěła. Z njeju jo wóna pilnje te tšojenja a wuwiśa we muzeju sobu wugótowała. Wjele jo rentnaŕka Ingrid Standkowa z Drjowka wót Roswithy Baumertoweje nawuknuła, jo jej stawnje pśez ramje glědała. To wšo jej źinsa pśi jeje dobrowólnem źěle w muzeju kradu pomaga, wóna se rozmějo na tu wěc. Ako jo hyšći w swójom pówołanju, ga we źiśowni „Erntekindergarten“ w Malinju (Greifenhain) źěłała, jo wóna tym źiśam, se wě, teke wjele wó serbskem žywjenju pósrědniła, ale to dawno njamóžoš pśirownowaś ze źěłom w muzeju.