Z Hochoze/Drachhausen. Hochoska šołtowka Doreen Krötelowa jo pśedslědny tyźeń njezjapki z wósobinskich a strowotniskich pśicynow swój amt złožyła. K tym pśicynam njejo Doreen Krötelowa kśěła se dalej wugroniś. Jeje nadawki něnt nachylnje pśewzejo zastupny šołta Christian Ulbricht. Góźba za slědkglědanje na zachadne lěto we Hochozy.

Powěsć wót wótstupa šołtowki njejo se pśedslědny kóńc tyźenja hyšći wšuźi rozpowědała we jsy. Młoźina jo sobotu z małkeju akciju zapustowała. Pšawy pśeśěg abo camprowanje, se wě, njejo dało. Ale pśedsedaŕstwo wejsneje młoźiny jo z kólasom we jsy ducy było. Pla sponsorow młoźiny su na dwór stupili, zapustojsku muziku grali a se z małeju tutawu darow za pódpěru w zachadnem lěśe wuźěkowali. Šefowka hochoskeje młoźiny Iben Lotric jo spokojna:

„My smy rowno dobru powěsć dostali: Młoźinske śpy w picańskem amśe směju zasej wótcyniś. Togodla smějomy pśiducu sobotu we našej śpě tšochu gromaźe byś. Pšawe camprowanje abo zapustojski pśeśěg ale njamóžomy pśewjasć. Tam dajo pśewjele pśedpisow, kenž njamóžomy dopołniś.“