Mě se groni Lena–Marie Schmilkojc a ja som 15 lět stara. Ja bydlim we Wjerbnje, blisko wót Błotow. Tuchylu som wuknica Dolnoserbskego gymnaziuma. Ja cu abituru we tej šuli cyniś a dalej serbsku rěc powědaś. Mój nejlubšy pśedmjat jo pódla sporta zawěsće serbšćina. Ja powědam serbsku rěc južo 9 lět. Ja som była na zakładnej šuli „Mato Kosyk“ w Brjazynje. Tam som cyniła bilingualnu wucbu w matematice, wuměłstwje, stawiznach a nabóžninje. Teke w nimšćinje, ale how smy jano wuknuli nimsku gramatiku w serbskej rěcy. Ja som teke woglědała serbsku wucbu 4 raze wob tyźeń. Něnto mam serbsku wucbu pěś razow wob tyźeń a ja mam bilingualnu wucbu we stawiznach a wucbje wó źěle.

Mója sotša, mója śota a mója śeśenica teke powědaju serbski. Ja som wótrosła ze serbskeju rěcu. Něnt ja cynim praktikum pla Nowego Casnika. Ja som powědała z mójeju śotu. Wóna jo pśiraźiła, až ja cynim praktikum how. Ja měnim, až jo to rědna ideja, dokulaž ja se rada angažěrujom za serbsku tradiciju a kulturu. Ja rada pišom teksty abo powědam z mójeju familiju, gaž te wuměju serbski powědaś.