Z Města/Cottbus. LODKA w Serbskem domje móžo w měrcu slědk glědaś na wažny jubilej. W měrcu 1992 – to groni rowno pśed 30 lětami – jo wóna wótcyniła prědny raz swóje źurja za sobuźěłaśerki a za gósći a kupcow (wó tom buźo Casnik w měrcu hyšći pisaś). We tych tśich lětźasetkach su wóni wugótowali 116 wšakich wustajeńcow z mólbami, z fotami, z eksponatami serbskeje ludoweje kultury a z młogim drugim. To groni: kužde lěto wokoło styri!

Tu nejnowšu wustajeńcu we tom rěźe – tu 116. – su slědny tyźeń stwórtk wótwórili. Kužda doněntejšna wustajeńca jo była něco wósebnego a jadnoraznego. Ta nejnowša pak se w młogem rozeznawa wót tych drugich. K prědnemu su mógali ju pó dlejšem casu zasej z publikumom wótwóriś. Wokoło 15 zajmcow jo jich było ten wjacor, korona jo jim stajiła tu granicu. K drugemu jo w tej wustajeńcy tak mało eksponatow wiźeś ako hyšći žednje: jano dwanasćo wobrazow wisy na tych tśich wjelikich sćěnach w klubowni Serbskego doma. A ta tśeśa wósebnosć jo ta, až jo wiźeś na tych wobrazach pśecej to samske žeńskece woblico.