Wó zamrětych pisaś njejo lažko. Casnik to cyni. Teke łoni, gaž su serbski filmaŕ Toni Bruk, serbski wědomnostnik prof. dr. Hinc Šewc, serbski ceptaŕ a awtor Pětš Janaš, Roswita Baumertowa, wjednica muzeja w Drjowku, Marja Hentšelowa, znata serbska kantorka z Trjebina, abo Beno Pěčka, dłujkolětny serbski ceptaŕ w Bórkowach, wumrěli. Smy kśěli jim a drugim groniś wutšobny źěk za jich njewomucne źěło za to serbske a k tomu pśipomagaś, až wóstanu w našom nejlěpšem spomnjeśu.
Na jadnogo, kótaryž njejo wěcej mjazy nami, njejsmy bóžko w Casniku a docełego mjazy Serbami spominali. To pak njejo naša wina, njejsmy wó tom nic zgónili. Akle něnto jo se dostała toś ta tužna powěsć do redakcije. Južo łoni 17. julija jo wumrěł Albert Tica, we wusokem starstwje wót 97 lět, w decembrje 2023 by wón zešwyrnuł 100 lět!
Swój slědny wótpócynk jo namakał na kjarchobje w Njamorojcach (Illmersdorf) blisko Drjowka, źož jo teke jogo žeńska zakopowana. Wón jo se zasłužył, až něnto hyšći na njogo spominamy – na serbsku wósobinu, ako jo na swój part sobu stwóriła serbske žywjenje w Dolnej Łužycy głownje w casu DDR.