Z Janšojc/Jänschwalde. W źiśowni „Lutki“ jo cas ptaškoweje swajźby zaśěgnuł. Dla togo su se wšykne kupki z temu ptaški a zyma zabrali. W góletkowni su „wuchacki“ kuždy źeń w zajtšnem krejzu „Kleine Meise“ zespiwali a wurejowali. Tek źiśi Witaj-kupki „Liški“ a jeje susedskeje kupki „Sowy“ su ten spiw a spiw ptaškoweje swajźby za wjeliki źeń wěrowanja zwucyli. Wušej togo su cesto baseń zymy zwóspjetowali, pisane ptaški za wokna wubaslili, garderobu z małymi wumólowańskimi wobrazami k temje wupyšnili a samo futer za ptaški zgótowali. „Wjelki“ su w tom casu wósebnje pjeršate byli, dokulaž jeje pśedšulska kupka kužde lěto njewjesćinski pórik wuzwólijo a wěrujo. Naša njewjesta jo Isabella Bohgojc z Drjejc była, dokulaž jeje familija serbske tradicije nic jano w źiśowni, ale teke doma we jsy woplěwa. Isabella jo mógła swójogo nawóženja se wuzwóliś, gólcy pak njejsu tak skobodne byli. Nico Mitschke, teke z Drjejc, jo pak radosnje pśigłosył a tak su se wšykne „Wjelki“ pón teke pśigótowali.