Z redakcije/Redaktion. Nowy Casnik ma wót februara 2022 nowu sobuźěłaśeŕku. How se pśedstajijo:

Mě se groni Annalena Ješkojc abo jan Ankalenka a som 19 lět stara. Pópšawem bydlim w Picnju, ale wětšy źěl casa som pla mójogo pśijaśela w Chóśebuzu. Smej wuknika Dolnoserbskego gymnaziuma byłej a něnto studěrujomej na wuceński amt w Pódstupimje. Mójej pśedmjata stej biologija a zemjepis (geografija) a som akle w prědnem semestrje. Gaž som studium wuspěšnje skóńcyła, ja by wjelgin rada na Dolnoserbskem gymnaziumje ako wucabnica źěłała, pśeto mě ta rědna šula juž kradu felujo. Mimo togo com pśecej móju identitu k serbstwoju wobchowaś, dokulaž som pó abiturje a w casu pandemije wupytnuła, až njamóžom tak derje serbski powědaś ako w něgajšnych (šulskich) casach a com skóńcnje zasej až do pśiducego zajtša spiwaś, móju rědnu serbsku drastwu nosyś a z njeju rejowaś pśi nałogach. Jo, lubujom a trjebam serbske tradicije a swěźenje!