Online. Chto rozsuźijo na kaki part wó spěchowanju serbskich projektow w ramiku změny strukturow? To jo była głowna tema na prědnem lětosnem zmakanju serbskich gremijow, kenž jo se pónjeźele, 24. januara, na pśepšosenje pśedsedarja Domowiny, Dawida Statnika, digitalnje wótměło. Wobźělili su se zastupnice a zastupniki zwězkowego pśedsedaŕstwa kšywowego zwězka, załožboweje rady, parlamentariskeje pśirady załožby a serbskeju radowu Bramborskeje a Sakskeje. Pó wuměnje wó źěłabnosći zachadnych mjasecow su se tej temje změny strukturow pśiwobrośili. Na zakłaźe wobzamknjenja zwězkowego sejma z lěta 2020, až ma se glědaś na serbski lud pó § 17 nr. 31 kazni wó zmócnjenju strukturow doněntejšnych brunicowych rewěrow, jo wobgóspodarjenje srědkow nadawk Załožby za serbski lud.