Z Barlinja/Berlin. Tśi dny dłujko jo slědny tyźeń Zwězkowy sejm (Bundestag) wobradował wó pśiducych nadawkach. Wšykne ministaŕki a ministarje su tam pśedstajili swój program. Zastupniki wšych šesć frakcijow su k tomu powědali. Teke jaden z tych dogromady 736 wótpósłańcow w nowem nimskem parlamenśe, ako njepśisłuša žednej frakciji a sejźi ako jadnotliwc w sejmje, jo wustupił w diskusiji. Jo to Stefan Seidler ze Šleswig-Holšteinskeje, ako jo prědny raz pśed tym gremiumom powědał. Jogo běchu łoni w septembrje wuzwólili do parlamenta w Barlinju. Kandiděrował běšo wón za partaju „Südschleswigscher Wählerverband“ (SSW). Wóna bu 1948 załožona, ma něnt wokoło 3.500 cłonkow a zastupujo wósebnje interese tamneje dańskeje a friziskeje mjeńšyny w Šleswig-Holstejnskej. Wót lěta 1958 sejźi toś ta partaja južo w parlamenśe w Kielu – něnto z tśomi wótpósłańcami – a wót septembra 2021 něnto teke prědny raz w nejwušem nimskem parlamenśe.