Z Dešna/Dissen. Lětosa w aprylu buźo južo pěś lět, až bu w Dešnje w tamnem „Serbskem dwórje“ załožone nowe serbske towaristwo „Serbske koparje/Wendische Aus- wahl“. To jo pópšawem krotki cas, ale stało jo se w tych pěś lětach napšawdu wjelgin wjele. W młogich artikelach w Casniku a drugich medijach a teke pšawidłownje w Bramborskem serbskem radiju jo se wó tom pówěźeło, a samo we wósebnych bejnje tłustych knigłach w nimskej a serbskej rěcy, kenž jo zestajał Wolfgang Tschorn z Města, jo historija „Serbskich koparjow“ derje pśedstajona.

A něnt mamy hyšći jaden film wó nich, wó towaristwje a wó mustwje. Jomu se groni „Serbske koparje 2019 – 2021 – Stationen eines Traumes. Beobachtungen 2019 – 2021.“ Pśisamem poł góźiny dłujki wón jo. Awtor jo serbski filmaŕ Roman Pernak z Barlinja, syn znatego dolnoserbskego procowarja Měta Pernaka, ako jo 2020 wumrěł. Njejo to prědny raz, až se wón jawi a pokažo ako šykowny a dobry filmaŕ. Za woblubowany dolnoserbski telewizijny magacin „Łužyca“ ga jo wón južo cesćej wjerśeł reportaže a druge pśinoski ze serbskego žywjenja w Dolnej Łužycy.