Tradicionelne nowolětka z našogo regiona su ze solowego śěsta. Z drugich regionow dajo teke „słodke“ recepty za śěstowe figury k nowemu lětoju, ako deje gluku a strowosć pśinjasć. Na pśikład dajo wšake recepty, źož se wužywa droždźejowe śěsto. Taki recept, z kótarymž daju se „swinki gluki“ wupjac, Wam how pśedstajijomy.
Tak se to pśigótujo:
Dajśo muku do wjelikeje šklě a formujśo wesrjejź dołk. Rozdrobśo droždźeje do dołka a pósypśo na to pitśku cukora. Wogrějśo mloko tak, až buźo glěwke. Połojcu togo mloka lejśo na droždźeje. Rozměšajśo to krotko z widlickami a pón wóstajśo šklu pókšytu 15 minutow stojecu. We tom casu wogrějśo zbytne mloko w gjarncu z butru a cukorom. Gaž jo butra rozejšła, wzejśo gjarnc wót warjeńskeje platy. Dajśo to mloko z butru do šklě z muku a droždźejami, teke jajo a šćipku soli dejtej slědowaś. Pón měsćo ze wšogo gładke śěsto. Wóno dej poł góźiny pókšyte se gibaś.