Lětosa we aprylu buźo to rowno pěś lět, až bu w Dešnje załožone nowe serbske towaristwo „Serbske koparje“ a k tomu teke mustwo za balokopanje. Pśedsedaŕstwo towaristwa ma južo prědne ideje, kak kśě ten jubilej wóswěśiś.
Jaden wót tych głownych iniciatorow za załoženje towaristwa jo był Maks Panaš (Pannasch) z Chóśebuza. Gromaźe z Horstom Krawcykom ze Žylowa a z drugimi jo wón wšykno pśigótował a na puś spórał. Bóžko pak njamóžo wěcej dožywiś toś ten jubilej. Gwězdku jo wón, 83lětny, wumrěł pó dlejšej chórosći, za tym, až běšo akle pśed krotkim casom zaśěgnuł do nowego domu za starych luźi na Schillerowej droze w Chóśebuzu.