W lěśe 2001 jo šwedojski statny koncern Vattenfall kupił łužyske jamy a milinarnje – něnto co firma je zasej pśedaś. Wjele jo se wó tom pisało. My comy pśedstajiś, co se we tom zwisku stanjo we Šwedojskej.
Nejžpjerwjej spokojom
We prědnych lětach su šwedojske byli spokojom. Pjenjeze ga su běžali do statneje kasy. Jano wobswětowej partaji Miljöpartiet njejo se wudobywanje brunice spódobało. Ale pómałem jo kritika bywała głosnjej słyšaś. Teke mjazy socialdemokratami, dokulaž pśez palenje brunice se wustarkujo pśewjele wuglikowego dioksida (CO₂) do atmosfery. We Šwedojskej ga matej wobswět a klima wjeliku wažnosć. W lěśe 2004 jo Riksrevisionsverket (amt, ak kontrolěrujo druge zastojnstwa a statne koncerny) kšuśe kritizěrował Vattenfall. Vattenfallowe statkowanje w Pólskej a Nimskej se snaź njemaka ze šwedojskeju politiku, su gronili. Ale hyšći jo wšo se bulało. Ale zmyslonosć luźi jo chopiła se pśewobrośowaś. Protesty wobswětowych aktiwistow su bywali dlej a mócnjejše.
Jamy su wurostli k mórawje