Z Hamburga. Tuchylu běžy faza procowanja za wuknikojski stipendium „grips gewinnt“. Załožba Joachima Herza z Hamburga póbitujo wóny stipendium, kenž spěchujo pó wugbaśach mócnych, angažěrowanych młodostnych wót źewjeteje rědownje do abitury. Procowaś směju se teke wuknice a wukniki z Bramborskeje – gaž njejsu k casu planowanego šulskego wótzamknjenja starše ako 21 lět. Dogromady se pśiwzejo až do 100 młodostnych do togo spěchowańskego programa. Cas procowanja se skóńcyjo dnja 15. februara 2022.

Wuknikojski stipendium „grips gewinnt“ wobstoj wót lěta 2011. Zmyslony jo za motiwěrowanych młodostnych, ako maju wósebne wupominanja na swójom kubłańskem a žywjeńskem puśu dla financielnych, familiarnych abo socialnych pśicynow. Program pódpěra stipendiatow a stipendiatki financielnje z 180 euro wob mjasec kaž teke ze seminarami k wuwiśu wósobiny a z wósobinskim póraźowanim ku temam šula, wukubłanje a studium.