Z Města/Cottbus. Kóńc nowembra jo Eric Osterwald wózjawił swój – až dotychměst – nejwětšy filmowy projekt na youtube. Jo to 20 minutow dłujki film „Wrośenje Nadpśirodnego – Die Wiederkehr des Übernatürlichen“, kenž jo młody serbski režiser zapódał k lětosnej 19. Łužyskej filmowej pśeglědce.
Techniskich problemow dla njejo se pśedstajenje swójogo nowego filma pak tak pšawje zglucyło, což Eric Osterwald woblutujo. „Smy dlej ako lěto źěłali za ten film“, groni wón. „To jo było bólosne, dokulaž smy teke kradu wjele serbskego pśeźěłali. Ale se wě, až jo južo wuspěch wiźeś swójsku twóŕbu na płachśe!“
Pó źěłach se zda jadnanje filma pódobne filmam US-amerikańskego studija Marvel, na wšaki part jo weto wjelgin originelne. Tak jo głowny antagonist ako „superryśaŕ“ tarnowany cart (Eric Osterwald). Wón jo kandidat za amt chóśebuskego šołty a pśegónjujo figury ze serbskich powěsćow. Ako teroristy a njeměrniki zasuźowane fabulowe byśa pśidu pón gromadu, aby jogo pśemógli.