Z Města/Cottbus. W decembrje 2020 jo mógał Serbski muzej w Chóśebuzu se wósebnemu pśidobytku wjaseliś: Jo dostał wósym wobrazow Fryca Latka (*1895 w Nowej Jsy, †1980 we Weimarje), jadnogo z nejwuznamnjejšych serbskich mólarjow 20. stolěśa. Su to wólejowe wobraze na płaśe, pokazujuce dolnołužyske krajiny z wódu, a słušajuce do konwoluta z dogromady źaseś Latkowymi wobrazami. Muzej jo z tym pśidobytkom ceły drogotny konwolut, póchadajucy ze zběrkowu dweju wobsejźarjeju, ako wobogaśenje w swójej zběrce měł. Ale: źaseś wobrazow jo hyšći cakało na trjebne restawrěrowanje. Teke to – kaž juž to wobstaranje tych wobrazow – jo źěkowano angažowanych procow Spěchowańskego towaristwa chóśebuskego Serbskego muzeja se raźiło. We oktobrje a nowembrje 2021 su dali tym Latkowym wobrazam a hyšći dwěma dalšnyma mólboma z muzejowego wobstatka restawrěrowaś. Wuslědk jo późiwabny! Ale daś se nejpjerwjej ta slězyna wobswětlujo: Prědny wobraz ze spomnjetego konwoluta Latka jo spěchowańske towaristwo pśed dlejšym casom kupiło a zběrce muzeja dariło.