Z Bórkow/Burg. Pśedslědnu sobotu jo było tśeśe zymske wandrowanje pó Wobsednych Bórkowach. Pśi kradu zymnem wjedrje jo Kerstin Möbesowa, zagronita za rownostajenje w bórkojskem amśe, wjadła tśo gósći. „Tyźeń pjerwjej jo jich było jadnasćo luźi“, jo wóna měniła. „Ja a swója kolegowka Christiane Pfaffowa póbitujomej to wandrowanje za gósći, wšojadno lěc pśiźo dwanasćo abo dwa.“

Amt Bórkowy jo južo łoni wupowěźeł take wjeźenja, korony dla pak njejsu se raźili. Weto jo amt instalěrował wšake tematiske tofle za to wandrowanje. Tak mógu turisty teke sami wandrowaś pó Bórkowach a – we wukładnych woknach wšakich stacijow – cytaś wó swěźenjach, tradicijach a pśiwěrje Błośanarjow.

Mała kupka jo se mjazy drugim woglědała Domownisku śpu, wejsańsku cerkwju, Błośańsku biblioteku „Mina Witkojc“, dwór Möbertojc gjarncaŕskeje śpicki a něgajšne dwórnišćo we Bórkowach. Na poł droze, pśi Sprjewinem pśistawje, su gósći dostali warjone wino abo tej, aby se wogrěli. Pótom, pśi chromje amtskego zastojnstwa, jo wjednica wudała małe kapsne lampy ako souvenir.