Jo, kak mógu klincaś gódy wu nas Dolnoserbow? To jo raz pšašał Nowy Casnik redaktorce Bramborskego serbskego radija rbb Martinu Golašojc a Katarzynu „Kasiu“ Fidekowu, ako stej zagronitej za lětosny gódowny koncert pó žycenjach pśisłucharjow rbb. Wó tom koncerśe dnja 26. decembra informěrujo tež inserat, ako jo se wózjawił w slědnem wudaśu Nowego Casnika.

Grońtej pšosym, Martina a Kasia: Na co mógu se pśisłucharje Wašogo sćelaka wjaseliś w lětosnem pśedgódownem a gódownem casu? Mimo togo koncerta?

Martina Golašojc: Za pśisłuchaŕki a pśisłucharjow we kuždem starstwje, ale wósebnje za źiśi, mamy w programje naš znějucy gódowny kalendaŕ. Pśed 17 lětami smy prědny raz taki kalendaŕ wusćełali a kuždy źeń wót prědnego až do 24. decembra wótcynijomy jadno woknyško. Za takim chowaju se tšojeńka, wulicowańka, bajki a spiwy kołowokoło adwenta a gód.