Wót 22. do 25. nowembra jo se w Šwedskej wótměła cerkwina synoda. A w jeje ramiku, dnja 24. nowembra, jo se w sławnej katedrali w Uppsali něco wurědnego stało. We wósebnej namšy jo šwedska cerkwja oficielnje pšosyła samiski lud wó wódawanje za te wjele pśepśimjeśa a za diskriminaciju, ako jo wóna samiskemu ludoju nacyniła a tak pśez dłujki cas winu na se brała. Jadna se how wó namócnu christianizaciju, zakazanje samiskeje rěcy, źělenje samiskich źiśi wót swójeju starjejšeju a tyknjenje do internatow, źož su jano směli šwedski powědaś, zdźěla wutamanje indigeneje samiskeje kultury a rasowo-biologiske slěźenja. To wšykno su samiske reprezentanty na zachopjeńku namše namšaŕkam a namšarjam a šwedskej zjawnosći (namša jo hyšći we interneśe wiźeś) pśednjasli.