Lube źiśi,
lětosa jo se wótměło 14. Bórkojske pisańske wuběźowanje za źiśi. Wó tom wótśišćujomy pśinosk!
„To jo mjaztym dobra tradicija, až se zmakaju wobźělniki Bórkojskego pisańskego wuběźowanja ,Kinder schreiben für Kinder‘ zachopjeńk decembra k wugódnośenju wuběźowanja. Lětosa jo wjele było hynac. Śišć kniglickow k wuběźowanju z tymi 42 zapódanymi pśinoskami jo akle tyźeń pózdźej móžny był, pśeto nakładnistwo njejo měło dosć papjery. Te knigły su se dogótowali k pśedwjacoroju tśeśego adwenta. Dla pandemije njejo tenraz dało pśepódaśe mytow w bórkojskem Domje zmakanja. Pśepódaśe jo se pśewjadło pód gołym njebjom pśed bórkojskeju knigłaŕnju „Lesezeichen“. Mějaŕka teje knigłaŕnje Ines Bunzelowa jo pśed 14 lětami zgromaźe z błośańskeju awtorku Marlene Jedrowu to póbitowanje za źiśi wót šesć do 14 lět iniciěrowała.