Normalnje zgónijomy wót wuslědkow literarnego wuběźowanja Ludowego nakładnistwa Domowina a Załožby za serbski lud akle za tym až jo se wótměło cesne zarědowanje za mytowany serbski literariski dorost. To zarědowanje pśewjedu tradicionelnje w gósćeńcu Wjelbik w Budyšynje. Lětosa to pak hynac jo – dla problematiskeje korona-situacije su wótpowěźeli to mytowańske zarědowanje. Ale wótglědajucy wót togo su se pśed dwěma tyźenjoma te wuslědki lětosnego literarnego wuběźowanja k wěsći dali. 20 młodych awtorow a awtorkow jo se z dogromady 35 pśinoskami wobźěliło. Mjazy nimi jo jano jadna wósoba, ako jo dolnoserbske teksty zapódała, a to jo Justyna Michniuk. Ta w Pólskej roźona bydli juž dlejšy cas we Zaspach.