Z Pódstupima/Potsdam. Wałtoru tyźeń jo bramborska serbska rada (RASW) stupiła gromadu za swójo 15. pósejźenje. Pandemiskeje situacije dla njejsu se zmakali w Krajnem sejmje Bramborskeje, ale digitalnje.
W swójej rozpšawje jo se RASW mjazy drugim póśěgnuła na poziciju Isabell Hiekeloweje (Zwězk 90/Zelene), kótaraž jo kritizěrowała Kulturny plan Łužyca. Rozmjej: Wót bramborskego Ministaŕstwa za wědomnosć, slěźenje a kulturu (MWFK) iniciěrowany plan hyšći njezapśěgnjo dosć dypkow k dobremu Serbow.
Pótom jo RASW rozpšawiła wót digitalnego wobradowanja ze cłonkami Rady za serbske nastupnosći w Sakskej. Za tym, až jo Marko Suchy w septembrje wótstupił wót pśedsedaŕstwa teje rady, su cłonki kśěli se informěrowaś wó źěłowej wašni bramborskich kolegow. Tak su se 26. nowembra mjazy sobu pśedstajili a powědali wó nadawkach a móžnosćach togo cesnoamtskego źěła.